22.05.2018 / Elecziuns dalla Regenza / /

Marcus Caduff e Mario Cavigelli – ina bun’elecziun per il Grischun

El croda buc si entras gronds plaids. Marcus Caduff ei in luvrader dilligent e sequalifichescha entras sia moda da luvrar ponderada e cun clara finamira.

dapli

El croda buc si entras gronds plaids. Marcus Caduff ei in luvrader dilligent e sequalifichescha entras sia moda da luvrar ponderada e cun clara finamira. Sias ragischs en sia patria e sias experienzas multifaras da clamada e da politica da societad ch’el ha rimnau en nossa tiara ed egl jester rendan agl agronom ed econom da menaschi ch’ei carschius si en ina famiglia da purs da muntogna en Lumnezia il fundament necessari per in mandat ella regenza grischuna. Marcus Caduff s’occupescha da problems e porta buc mo ideas mobein semetta era en per realisar ellas. Exact aschia hai jeu remarcau el sco president da fracziun, sco collega dil cussegl grond mo era sco representant d’interess dil turissem, sco CEO dil Spital regiunal Surselva ed actualmein sco president d’organisaziun dil Tir cantunal. Ord quei seresulta mia perschuasiun che Marcus Caduff ei in cass da cletg e ch’el mereta in’elecziun d’honur.

Exact il medem vala per il president dalla regenza en uffeci Mario Cavigelli. Sco parsura dil departament da baghegiar, da traffic e da selvicultura porta el dapi otg onns la responsabladad per ils camps dalla forza hidraulica e d’energia, dil traffic, dallas vias, d’immobiglias, dils fatgs da submissiun, dils fatgs da selvicultura sco era dalla catscha e pesca. Sia direcziun d’uffeci che s’imprima en sia cumpetenza dil fatg, dalla forza da perschuader e d’in’aviartadad per il niev porta grond avantatg per in svilup positiv da nies cantun. Sil camp naziunal enquera Cavigelli coaliziuns e batta cun insistenza pils interess dils cantuns muntagnards.

Per dar damogn als pensums gronds che spetgan en nies cantun drova ei la forza d’agir e la capacitad da giudicar – jeu cussegliel perquei l’elecziun da Marcus Caduff e Mario Cavigelli ella regenza.

Per la capacitad da giudicar e la forza d’agir stattan era diesch dunnas ed umens dalla pcd che semettan a disposiziun per l’elecziun el cussegl grond resp. sco suppleants. En lur varietad concernet vegliadetgna, derivonza da clamada e famiglia e lur experienza politica vegnan els a representar ils interess dil pievel a moda oreifra. Jeu sun perschuadida ch’ei vegnan a sestentar cun tutta forza per in bien futur dalla regiun e dil cantun e meretan ils 10 da zercladur nossa confidonza.

Margrit Darms-Landolt, deputada e presidenta dalla PCD cumin dalla foppa